64 20 年

今日的頭條, 某些報章當然以 64 為頭條, 放左最顯眼的頭版~
今天天氣陰晴不定, 還不時下著雨, 絕對是一種考驗,

風雨不改嗎 ?

自己計, 當然風雨不改~


click to enlarge



延伸閱讀 :

newsgroup 上, 伯多錄朋友的小小提示 :

謝伯多錄版友熱心提點
以下容我再三轉貼他的六四燭光晚會小貼士

今年可能有唔少新朋友參加64晚會,亦對晚會有好多疑問.

結合過十年的經驗,有以下少少貼士想提下大家

01) 根據王丹的呼籲,希望大家著白色衫到場.(資料來源:明報)
02) 如果可以的話,你愈帶得野少,行動會愈方便.
03) 記得帶水,因為通常都幾熱同幾焗.
04) 估計會落雨,可以著便利雨衣.方便過帶遮.亦可能帶定垃圾膠袋擺地下坐.
05) 如果唔坐得地下,可以自己帶張行山椅.坐係個區後面,儘量唔好阻人.而維園內的看台係會無晒的.
06) 避開座喇叭下面,否則我估你聾足成日.
07) 小心火種,年年都會有朋友發生燒著張蠟燭隔火紙的意外.
08) 年年都會有人倒瀉蠟落地下,而由於蠟係極難清理既.所以, 請小心盡量唔好倒瀉啦.散場時會有好心人帶剷去幫手剷蠟,大家亦可以幫手.而我的做法會預備一張紙或者罐,隔一段時間倒走多餘的蠟.
09) 完場後請清理自己的垃圾,亦幫手執其他人的垃圾.
10) 七點半左右就好去到,行下Booth,行下展版,了解下六四事件.
11) 所有Booth同捐款車仔都係無錢找,所以唱定廿蚊紙.
12) 各大院校都會出特刊,睇番咁多年,我覺得中大個本係最好睇,而港大同樹仁都唔錯.通常會有學生派,不過亦可以去Booth拎.雖然係免費取閱,不過都應該捐番少少錢啦.不過數量有限,太遲去到你有權派晒的.今年幾間大學聯合出一本名為《我們二十——國家走到哪裏》的特刊,於會場免費派發,市民亦可到各大專院校索取.(資料來源:蘋果日報)。
13) 係近中央圖書館一帶,有時會有幾個阿叔鬧鬼參加者.唔需要同佢地嘈,笑笑口走開就是了.
14) 事前事後唔好諗住係附近食野,幾難搵位.
15) 主台係天后個一邊,不過Booth係銅鑼灣個一邊.
16) 完場後如果係搭巴士(向北角方向),維園係有站的,不過好難上到車,Sogo都係死,我會行去消防局先搭.
17) 晚會最短試過45分鐘就完(因為天氣超差),通常一粒鐘鬆少少,近年最長都係個半鐘多少少.不過如果你唔急,可以留係度唱下歌,幫手清下場,等人少d先慢慢走.
18) 其實現場有大量糾察,如有任何問題,可請求他們幫助.
19) 這是一個紀念晚會,不是舞會,更不是派對.以前見過年青人去到好似燒野食咁開心,希望大家保持莊重.
20) 大家亦唔係睇緊勁歌金曲,如果有傳媒影你相,亦唔需要太過介意.警方及懷疑中方人士會作現場錄影,亦不用阻他們,他們都是執行工作.
21) 臘燭免費派發,不用自備.當然亦希望大家捐款支持.不過根據李卓仁的呼籲,建議如果1 pair人就最好夾埋拎一支, 一個家庭又係最好拎一支, 亦歡迎自備白色蠟燭. (資料來源:蘋果日報)
22) 現場設有烈士紀念碑及國殤之柱,會前會後有部份參加者會自行到前默哀或獻花.只要不影響活動,亦是歡迎的.鮮花則要自備.
23) 有部份參加者會臂纏黑紗,不過大會不會供應.
24) 整晚活動內容大約包括:唱民運歌曲,讀宣言,喊口號,睇下一些介紹六四的表現/影帶,同海外民運人士訪問,默哀,大會代表獻花等等.相關資料可參考場刊,由工作人員在入口處派發.
25) 活動於8時開始,不過同香港各大型演唱會一樣,都係要等多一陣先正式開始,記憶中都無咩野準時過.
26) 活動主要係六個硬地場進行.不過根據報導,如果人數太多,部份遲來人士可能需要到草地坐.到時聽工作人員指示.(資料來源:蘋果日報)
27) 如果有朋友友有興趣買"曾蔭權不代表我"T-Shirt,可於1730後,到位於維園銅鑼灣入口的公民黨攤位購買.(資料來源:網上介紹)

睇下其他版友有無補充.

歡迎任何朋友轉登至各網上論壇/討論區,Facebook,Email,或任何你認為合適的地方.只需加番個(FWD)即可,唔登名都完全無所謂,亦唔需要向小弟請示.

如有任何更新及賜教,歡迎大家提出.我會不斷Update.

.

留言

發佈留言

此網誌的熱門文章

讓沒有無線連接的DSLR相機也可以用無線連接 TP LINK TL-MR3040

又黎 DIY, filter holder for panasonic 7 - 14mm ultra wide lens

幾個人在途上 _ 再戰飛鵝山發射站